Një vajzë e brishtë me një çantë të mbushur me libra, ecte me të shpejtë shkallëve të bibliotekës. Në shikim të parë dukej si studentet e zakonshme të cilat studiojnë me zell në ditët përcëlluese të korrikut në bibliotekë.
Por jo. Ajo ishte pak më e pazakonshme. Dje i kishte mbushur 19 vjet dhe sot donte të bënte dhuratë. Jo një dhuratë, por pesë. Thoshte të jetë përngut dhe kërkonte zyrën e drejtoreshës. E kishte botuar librin e parë dhe donte t’i dhuronte bibliotekës ekzemplarët e parë të librit. Edhe emrin e kishte të pazakonshëm. Quhet Andika Pllana dhe kishte mbaruar vitin e parë në Fakultetin e Shkencave Matematike – Natyrore në drejtimin e biologjisë molekulare.
Libri i parë e Andikës nuk ishte me poezi siç publikojnë zakonisht te ne autorët e rinj. Libri me titull këlthitës quhet “Aty ku heshtja takon britmën”, është roman.
-Qysh e vogël, biblioteka ishte strehë e veçantë për mua, po, sepse më krijonte ndjenjën e rehatisë. Duke qëndruar në mesin e shumë librave, biblioteka “Hivzi Sylejmani” më bënte të hyja në botën e imagjinatës. Biblioteka për mua portretizohet si dashuria e parë për librin, sepse aty e gjeta thelbin e jetës.
Autores i pëlqejnë gjërat e rrezikshme. Sfidat dhe shkrimi i një novele sipas saj ishte aventurë që kërkonte trimëri. Pritja për kthim të dashurisë së parë me shpresën që kishte mbetur në komë e cila as nuk jetonte, por as nuk vdiste, është tematika e thurur në rreshtat e librit. Rikthimi, përballja, pendimi, janë disa nga ngjarjet që e përshkruajnë librin.
A do të triumfojë dashuria apo inati? Përgjigjen e kësaj pyetje e gjeni në këtë roman që gjendet edhe në shitje, ashtu si edhe në raftet e bibliotekës “Hivzi Sulejmani” të Prishtinës.
Libri u botua nga SHB “Artini” dhe është financuar nga Drajtoria për Arsim e Fushë Kosovës.