E titulluar sipas vargut të poetes Fehime Selimi "Fjala ime ka etje"- 7 marsin – Ditën e mësuesit, Biblioteka “Hivzi Sulejmani” e shënoi me një aktivitet të ngjeshur letrar. Me poezi të krijuara nga autoret e Kosovës në vitet ‘70’-’80 të shekullit të kaluar, shumica prej tyre mësimdhënëse, 7 marsi ishte edhe festë e vargjeve.
Kryetari i Kryeqytetit Përparim Rama, përndryshe fëmijë i dy profesorëve, duke i përshëndetur të pranishmet, e vlerësoi lart rolin e mësuesit në shoqërinë e Kosovës dhe përkushtimin e tyre të paepur për mësim dhe edukim.
Në vazhdim, vargjet e tyre i lexuan: Flora Brovina, Shefkije Islamaj, Dije Demiri Frangu, Miradije Ramiqi, Shukrije Gashi, Merrushe Zogaj dhe Sabile Keçmezi Basha. Bibliotekistet tona interpretuan vargje nga poetet e ndjera: Hida Halimi, Edi Shukriu dhe Fehime Selimi.
Aktivitetin e pasuruan interpretimet e këngëve të vjetra shqipe nga kori “Nexhmije Pagarusha” drejtuar nga profesoresha e muzikës Nazlije Beadini, kurse vargjet u shoqëruan me tinguj piano nga Vesa Veselaj.
Në fund një koktel mes mikeve poetesha, profesoresha, bibliotekiste, lexuese e këngëtare. Editorja e shtëpisë botuese “Littera” Donika Dabishevci dhuroi libra për të pranishmet ashtu si edhe biblioteka “Hivzi Sulejmani” kurse zonja e parë e kryeqytetit Kristale Ivezaj Rama dhuroi lule të freskëta për të gjitha pjesmarrëset dhe zonjat në publik.
Në ditën e sotme, më 7 mars, 138 vjet më parë, dy vasha nga qyteti i Manastirit Sevasti dhe Parashqevi Qiriazi, e hapën Shkollën e Parë Shqipe. Njohëse të disa gjuhëve dhe me kulturë të lartë, familja e Qiriazëve të ndritur, herët kishte rënë në kontakt në patriotët shqiptarë dhe me misionarët protestantë amerikanë të cilët e udhëhiqnin një shkollë pranë shtëpisë së tyre. Sevastia u diplomua shkëlqyer në këtë shkollë. Studimet i vazhdoi të Robert College, i vetmi universitet joturk në Perandorinë Osmane duke qenë tashmë gruaja e parë shqiptare që e mbaroi arsimin e lartë. Në ndërkohë, në këtë kolegj diplomon edhe e motra e Sevastisë, Parashqevia, fëmija i dhjetë i Qiriazëve të përndritur dhe ajo bëhet ndihmesë e madhe për motrën sidomos pas vrasjes së vëllaut të madh Gjerasimit. Parashqevia i kreu studimet e magjistraturës ne Ohajo të SHBA.